بين مجازر ليبيا ومجازر غزه وصلاح جاهين

[فارس اللواء]

سالت العين بسخونه
بعد ما شافت الدم من ضحيه مظلوم
افتكرنا حد يشيل هم المكلوم
بعد نظره وصدمه وخوف
روحنا نشكي بهموم
العالم كله مطنش عن دم الشهداء
في غزه ولبنان وصبرا
سقطوا السُعداء
وفي ليبيا هب النايم علشان البترول
دي واخده موقع جامد
وكمان دوغري علي طول
والجيش العربي اتحرك
علشان دم الناس
طب ماهو اللي في غزه
دول برضو بني آدمين
ليه يابشر محتاس
وعلي الفُرقه واخدين
دي كانت زمان فوق الراس
مع عرفات وعباس
اشمعني دلوقتي رميتوا
الهم بإخلاص
والله ربنا هايسألكم
يابشر بلا إحساس

كانت هذه خواطري الشخصيه بعدما تذكرت خواطر الأستاذ صلاح جاهين إبان مجزرة بحر البقر التي راح فيها الضحايا الأبرياء وهاهي الجريمة تحدث بكل غباء، ولا مُنصف يشيل هم السُعداء،بشهادة أهاليهم ورحمة السماء

ايه رايك في البقع الحمرا
يا ضمير العالم يا عزيزى
دى لطفلة مصرية سمرا
كانت من اشطر تلاميذى
دمها راسم زهرة
راسم راية ثورة
راسم وجه مؤامرة
راسم خلق جبارة
راسم نار
راسم عار
ع الصهيونية والاستعمار
والدنيا اللى عليهم صابرة
وساكتة على فعل الاباليس
الدرس انتهى
لموا الكراريس

ايه رأى رجال الفكر الحر
فى الفكرة دى المنقوشة بالدم
من طفل فقير مولود في المر
لكن كان حلو ضحوك الفم
دم الطفل الفلاح
راسم شمس الصباح
راسم شجرة تفاح
فى جناين الاصلاح
راسم تمساح
بالف جناح
فى دنيا مليانة بالاشباح
لكنها قلبها مرتاح
وساكتة على فعل الاباليس
انتهى الدرس
لموا الكراريس

ايه رايك ياشعب ياعربى
ايه رايك يا شعب الاحرار
دم الاطفال جايلك يحبى
يقول انتقموا من الاشرار
ويسيل ع الاوراق
يتهجى الاسماء
ويطالب الاباء
بالثأر للابناء
ويرسم سيف
يهد الزيف
ويلمع لمعة شمس الصيف
فى دنيا فيها النور بقى طيف
وساكتة على فعل الاباليس
الدرس انتهى
لموا الكراريس

[ريم الشاطي]

كلام راقي بيخش القلب
ويزلزل تخاريف الراس
ويصبح دمي حبر يكب
كلام الحزن فكراس
دم الشهدا يصب يصب
والجثه عالارض بتنداس
ودموع العين سكب فسكب
ولا جاها نوم وللا نعاس
ياراعي الموقع هب وهب
وصل صوتي لكل الناس
وسلم ورده لكل محب
وكل الشهدا فوق الراس

[ريم الشاطي]

اشكرك اخي على هذه الكلمات
التي اججت قريحتي
رغم اني لست بشاعره

[فارس اللواء]

أشكرك أختنا الفاضله ريم الشاطي

[قصف الرعود]

بورك فيك
بين ليبيا وغزة اخوانا في مصر